यू–१९ महिला विश्वकप छनौट : जित्नैपर्ने दवावमा नेपाल आज युएईसँग भिड्दै

काठमाडौँ, कार्तिक २८ । आईसीसी यू–१९ महिला टी–२० विश्वकप एसिया छनोट अन्तर्गत आज नेपाल अन्तिम खेलमा घरेलु टिम युएईविरुद्ध खेल्दै छ ।

दुबईस्थित द सेभेन स्टेडियममा हुने यो खेल दिउँसो ३ः१५ बजेदेखि शुरु हुँदैछ ।

प्रतियोगितामा युएई ५ खेलमा सबै खेल जितेर १० अंकसहित शीर्ष स्थानमा छ भने नेपालले ५ खेलमा ४ जित र एक हार बेहोर्दै ८ अंकसहित दोस्रो स्थानमा रहेको छ ।

आज हुने यस खेलले विश्वकपमा छनौट हुने टिमको निर्णय लिने छ । नेपाल यस खेलमा जित्नैपर्ने अवस्थामा रहेको छ । २ अंकले पछि रहेको नेपालले युएईलाई राम्रो रनरेटमा पराजित गरेर शीर्ष स्थानमा उक्लिने अवसर रहेको छ ।

छनोट प्रतियोगिता नेपाल र कुवेतसँगै आयोजक यूएई र थाइल्याण्ड सहभागी छन् । डबल राउण्ड रोविनका आधारमा खेलाइएको यस प्रतियोगितामा शीर्ष स्थानमा रहने टोली अर्को वर्ष मलेसियामा हुने यू–१९ महिला टी–२० विश्वकपमा छनोट हुनेछ ।