विद्यालयको शौचालय नजिक शव फेला

काठमाडौँ । कैलालीको धनगढी उपमहानगरपालिका वडा नम्बर ११ घोडसुवा स्थित ठेकराज माध्यमिक विद्यालयको शौचालय नजिक एक पुरुषको शव फेला परेको छ ।

सोमबार बिहान अन्दाजी ६० वर्षीय पुरुष व्यक्तिको सडिगली गएको अवस्थामा शव फेला परेको प्रहरीले जनाएको छ । शवलाई सेती प्रादेशिक अस्पतालको शव गृहमा राखिएको भन्दै आफन्तलाई सनाखतका लागि आउन आग्रह गरिएको जिल्ला प्रहरी कार्यालय कैलालीका प्रहरी नायव उपरीक्षक कवीन्द्र सिंह बोहोराले जानकारी दिए ।

उनको हुलिया गहुँगोरो वर्ण, उचाइ ५ फिट ५ इन्च, माथिल्लो शरीरमा सेतो धर्के आस्कोट, भित्र सर्ट, तल्लो शरीरमा हाफ पाइन्ट र दाह्री फुलेको रहेको छ । मृतक शव नजिकै ढाका टोपी, घगारुको लाठी र च्यादर फेला परेको भन्दै प्रहरीले मृतक लाठी टेक्ने र टोपी लगाउने मानिस हुन सक्ने जनाएको छ ।