काँग्रेस सभापति देउवा आज सुदूरपश्चिम जाँदै

धनगढी, कार्तिक २५ । नेपाली कांग्रेस सभापति तथा पूर्वप्रधानमन्त्री शेरबहादुर देउवा आज सुदूरपश्चिम जाँदैछन् ।

गृहजिल्ला डडेल्धुराको विभिन्न कार्यक्रममा सहभागी हुन देउवा आज (आइतबार) बिहान १० बजे काठमाडौंबाट धनगढी पुग्न लागेका हुन् ।

प्रदेश कार्यसमितिका कार्यबाहक सभापति लोकराज अवस्थीले विज्ञप्तिमार्फत् देउवाको स्वागतका लागि गेटा विमानस्थलमा उपस्थित हुन नेता–कार्यकर्तालाई आग्रह गरेका छन् ।

सभापति देउवा कात्तिक २६ गते सोमबार डडेल्धुराको आलिताल गाउँपालिका र परशुराम नगरपालिकामा आयोजना हुने कार्यक्रममा सहभागी हुने कांग्रेस डडेल्धुराले जनाएको छ ।

कार्यतालिका अनुसार कात्तिक २७ गते गन्यापधुरा गाउँपालिकाको बडाल जाँत (जात्रा) मा सहभागी हुने छन् । त्यस्तै २८ गते पार्टीको जिल्ला कार्यसमितिको बैठक, पालिकास्तरीय भेटघाट र २९ गते कार्यकर्ता भेटघाट कार्यक्रममा सहभागी हुनेछन् ।

त्यसैगरी सभापति देउवा कात्तिक ३० गते गन्यापधुरा गाउँपालिका–१ रुवाखोलामा आयोजना हुने कार्यक्रममा सहभागी हुनेछन् । मंसिर १ गते डडेल्धुराको उग्रतारा मेलामा सहभागी हुनेछन् भने २ गते कैलालीको चौमाला बहुमुखी क्याम्पसको भवन उद्घाटन गर्ने कार्यक्रम तय भएको काँग्रेस सुदूरपश्चिम प्रदेश समितिले जनाएको छ ।