रोकेर राखेको म्याजिक भेनमा आगलागी
विराटनगर, कार्तिक २१ । मोरङको बूढीगंगा गाउँपालिका–२ मुस्लिम टोलमा रोकेर राखेको म्याजिक भ्यानमा मंगलबार राति अचानक आगलागी भएको छ ।
प्रदेश १–०२–००१ ज ३९४१ नम्बरको भ्यानमा राति ८ बजेतिर आगलागी भएको मोरङ प्रहरीका प्रवक्ता डीएसपी वेदप्रकाश जोशीले बताए । उनका अनुसार आगोले भ्यानमा पूर्णरूपले क्षति पुगेको छ ।
भ्यानका धनी एवं चालक सुनसरीको दुहबी नगरपालिका–२ का ४६ वर्षीय अजुवा मियाँले ल्याएर बूढीगंगा–२ स्थित छोरी रोजितनी खातुनको घरको अगाडि रोकेर राखेका थिए ।
आगलागीको खबरपश्चात जिल्ला प्रहरी कार्यालय मोरङबाट इन्स्पेक्टर दीपक लिम्बू र इलाका प्रहरी कार्यालय नेमुवाबाट सइ प्रवीण खड्काको नेतृत्वमा खटिएको टोलीले स्थानीयको सहयोगमा आगो नियन्त्रणमा लिएको थियो ।
आगलागीको कारण खुल्न नसकेको र घटनाको अनुसन्धान सुरु गरिएको प्रहरीले जनाएको छ ।
प्रकाशित मिति: २१ कार्तिक २०८१, बुधबार
