सर्लाहीमा पोखरीमा कार खस्दा दुई जना बेपत्ता

सर्लाही, कार्तिक २० । सर्लाहीको ईश्वरपुरमा पोखरीमा कार खस्दा दुई जना बेपत्ता भएका छन् ।

ईश्वरपुर नगरपालिका–२, भक्तिपुर मियाँखोरस्थित सडक छेउमा रहेको सरस्वती माध्यमिक विद्यालयको पोखरीमा आज (मंगलबार) विहान बयलवासबाट महोत्तरीको गौशालातर्फ गइरहेको लु २ च ६७५८ नम्बरको कार अनियन्त्रित भई खस्दा कार खस्दा दुई जना बेपत्ता भएका हुन् ।

बेपत्ता हुनेमा चालक गौशाला नगरपालिका–२, महोत्तरीका ३७ वर्षीय सुरेश महतो र कारमा सवार सोनमा गाउँपालिका–८, महोत्तरीका ३७ वर्षीय रामाकान्त ठाकुर रहेका छन् ।

कारमा सवार गौशाला नगरपालिका–२, का ३१ वर्षीय जनक यादव भने सकुशल बाहिर निस्कन सफल भएको प्रहरीले जनाएको छ ।

कारसहित पोखरीमा डुबेर बेपत्ता दुई जनाको नेपाल प्रहरी र सशस्त्र प्रहरीको टोलीले खोजी गरिरहेको घटनास्थलमा रहनुभएका इलाका प्रहरी कार्यालय केशरगन्ज, बयलवासका प्रहरी निरीक्षक उमाकान्त जोशीले जानकारी दिए ।

महोत्तरीको बर्दिबासस्थित सशस्त्र प्रहरी बलको छिन्नमस्ता बाहिनीबाट गोताखोर टोली समेत भर्खरै घटनास्थलमा आइपुगेको छ ।