नेपाल र स्कटल्यान्डबीचको खेल रद्द भएपछि अंक बाँडे
काठमाडौं, कार्तिक २० । आईसीसी क्रिकेट विश्वकप लिग–२ अन्तर्गत वर्षाले खेल रद्द भएपछि नेपाल र स्कटल्यान्डले अंक बाँडेका छन् ।
अमेरिकाको डालसस्थित ग्राउन्ड प्रेरी क्रिकेट रङ्गशालामा सोमबार राति सुरु भएको खेल आधिहुरीको सम्भावनासँगै रद्द भएपछि दुई टोलीले अंक बाँडेका हुन् ।
टस हारेर पहिला ब्याटिङको निम्तो पाएको नेपालले १ ओभरमा २ रन बनाएपछि वर्षा भएको थियो । वर्षाका कारण रोकिएको खेल सुरु हुँदा नेपालले ६ ओभरमा १ विकेट गुमाउँदै २६ रन बनाएपछि पुनः भएको वर्षाका कारण खेल रोकिएको हो ।
नेपालले आफूले खेलेका १२ खेलमध्ये २ वटामा मात्र जित निकालेको छ । यस्तै ८ खेलमा हार र २ खेल रद्द हुँदा नेपाल ६ अंकका साथ सातौं स्थानमा छ । नेपालले अब लिग २ का खेल २०२५ को मेमा स्कटल्यान्डमा गएर खेल्नेछ ।
प्रकाशित मिति: २० कार्तिक २०८१, मंगलबार
