पेस्तोल र गोलीसहित भारतीय नागरिक पक्राउ

रौतहट । सशस्त्र प्रहरीको गस्ती टोलीले पेस्तोल र गोलीसहित एक जना भारतीय नागरिकलाई पक्राउ गरेको छ ।

विशेष सूचनाको आधारमा सोमबार बिहान २ बजे सशस्त्र प्रहरी बल बीओपी बेलाबिछवाका प्रमुख इन्स्पेक्टर चेतन कुमार खड्काको कमाण्डमा गएको गस्ती टोलीले राजदेवी नगरपालिका ९ ब्रहमपुरी गाउँस्थित सञ्जीव सिंहले सञ्चालन गरेको पसलमा चेकजाँच गर्दा शौचालय बाहिर अवैध पेस्तोल सहित गोली बरामद गरेको हो ।

गस्ती टोलीले पसलमा रहेको शौचालय माथि एकथान नलकटुवा पेस्तोल, ८ एम एम को ३ थान गोली र १ थान खोका बरामद गरेको सशस्त्र प्रहरी रौतहटका प्रमुख एसपी विक्रम हुमागाईंले जानकारी दिए । उनका अनुसार हतियारसहित भारतीय नागरिक ४२ वर्षीय राजेश सिंह पक्राउ परेका छन् ।

पक्राउ परेका व्यक्तिलाई पेस्तोल गोलीसहित जिल्ला प्रहरी कार्यालय रौतहटमा बुझाएको छ । घटनाबारे थप अनुसन्धान भइरहेको प्रहरीले जनाएको छ ।