रवि लामिछानेसँगै सूर्यदर्शन सहकारी प्रकरणमा हिरासतमा रहेका पूर्वअसई को हुन् ?
काठमाडौं । पोखराको सूर्यदर्शन सहकारीको ठगीमा पक्राउ पर्नेमध्ये एक प्रहरीकै पूर्वअसई भएको खुलेको छ ।
प्रहरीको जागिर छाडेर व्यापारमा लागेका रामबहादुर खनाल यतीबेला कास्की प्रहरीको हिरासतमा पूर्वगृहमन्त्री रवि लामिछानेसँगै छन् ।
उनी जिबी राईको कम्पनी हर्ब्स इन्टरनेश्नलका सञ्चालक हुन् । तर, उनको सम्बन्ध जिबीभन्दा पूर्वडिआइजी छविलाल जोशीसँग रहेको स्रोत बताउँछ ।
जोशी प्रहरी सेवामा रहँदा उनै खनाललाई घुमुवा खटाएर पैसा उठाउने गर्दथे । खनालले जागिर छाडेपछि उनीमार्फत नै जोशीले विभिन्न ठाउँमा पैसा लगानी गरेका थिए ।
हर्ब्स इन्टरनेश्नलमा पनि जोशी एकसमय उपाध्यक्ष थिए । अवैध शैलीका गतिविधिबाटै उनी करोडपति बनेको चिनजानका व्यक्तिहरू बताउँछन् ।
हर्ब्स इन्टरनेश्नलमा वरिष्ठ अधिवक्ता बाबुराम कुँवर पनि हर्ताकर्ता थिए । हाल राष्ट्रपति रामचन्द्र पौडेलको कानुन विज्ञ रहेका कुँवरमाथि अनुसन्धान नगरिएको भन्दै आलोचना भइरहेको छ ।
प्रकाशित मिति: १४ कार्तिक २०८१, बुधबार
