‘शिक्षा र स्वास्थ्यको सुधार विना मुलुकको समृद्धि कठिन’

जनकपुरधाम १३ कात्तिक । नेपालका प्रथम राष्ट्रपति डा. रामवरण यादवले शिक्षा र स्वास्थ्यको सुधार विना देश तथा मधेशको समृद्धि कठिन हुने बताउनुभएको छ ।

जनकपुरधाममा रहेको राजर्षिजनक विश्व विद्यालयको सातौं वार्षिकोत्सव समारोहमा उहाँले मधेशको शिक्षा र स्वास्थ्य अहिले निक्कै कमजोर बनेको भन्दै यसको सुधारका लागि विश्व विद्यालयले काम गर्नुपर्ने आवश्यकता औँल्याउनुभयो । विश्वविद्यालयले गुणस्तरीय शिक्षामा विशेष ध्यान दिनुपर्नेमा उहाँले जोड दिनुभयो ।

लोकतान्त्रिक समाजवादी पार्टी नेपालका अध्यक्ष महन्थ ठाकुरले मधेशको शिक्षा र स्वास्थ्य, प्राकृतिक स्रोत र कृषि उत्पादनमा सुधार गर्न विश्वविद्यालयले विशेष ध्यान दिनुपर्ने बताउनुभयो ।

कांग्रेस नेता तथा पूर्व उपसभापति विमलेन्द्र निधिले विश्वविद्यालय स्थापनाका लागि जिल्ला स्तरीय अभियान सञ्चालन मार्फत् अर्थ जुटाउने सम्मको काम गरेको स्मरण गराउँदै ०७४ सालमा संघीय सरकारले राजर्षि जनक विश्वविद्यालय स्थापना गरेपछि निक्कै खुशी भएको बताउनुभयो ।

सो अवसरमा विश्वविद्यालय स्थापनामा अहम भूमिका खेल्नु भएका नेता द्वय लोसपाका अध्यक्ष महन्थ ठाकुर, कांग्रेस नेता विमलेन्द्र निधि, तत्कालीन धनुषाका जिल्ला विकास समितिका सभापति तथा नेपाली कांग्रेस प्रदेश सभाका सदस्य राम सरोज यादवलाई विश्वविद्यालयले सम्मान गरेको थियो ।