नवलपुरमा धारियो हतियार प्रहार गरी युवकको हत्या
नवलपरासी, कार्तिक १० । नवलपुरमा धारिलो हतियार प्रहार गरी एक युवकको हत्या भएको छ ।
शुक्रबार राति देवचुली–९ विशालटार निवासी २९ वर्षीय मिलन मानन्धरको हत्या भएको हो ।
हत्या गरेको आरोपमा देवचुली–९ निवासी ३० वर्षीय अर्जुन नेपालीलाई पक्राउ गरिएको जिल्ला प्रहरी कार्यालय नवलपुरका प्रहरी नायव उपरीक्षक जेशी शाहले जानकारी दिए ।
मानन्धरको हत्या गरेर फरार भएका नेपालीलाई राति नै कावासोती–१६ डण्डाबाट पक्राउ गरिएको प्रहरीले जनाएको छ ।
धारिलो हतियार प्रहारबाट गम्भीर घाइते भएका मानन्धरको उपचारको क्रममा राति भरतपुर अस्पतालमा उपचारको क्रममा निधन भएको हो ।
हत्याको कारण खुल्न नसकेको र त्यसबारे अनुसन्धान भइरहेको प्रहरीले जनाएको छ ।
प्रकाशित मिति: १० कार्तिक २०८१, शनिबार
