रौतहटबाट पेस्तोल र गोलीसहित दुई जना पक्राउ

रौतहट, कार्तिक १० । रौतहटबाट नलकटुवा पेस्तोल र गोलीसहित दुई जना पक्राउ परेका छन् ।

सशस्त्र प्रहरीको टोलीले कटहरिया नगरपालिका ३ का वर्ष २६ का कमोद राम चमार र वर्ष ४४ को नेमालाल साह बानियालाई पक्राउ गरेको हो ।

शुक्रवार साँझ गुजारा नगरपालिका ३ धन्सार गेट नजिकै विशेष सूचनाको आधारमा उनीहरुलाई पक्राउ गरिएको सशस्त्र प्रहरी रौतहटका प्रमुख एसपी विक्रम हुमागाईंले बताए ।

उनका अनुसार सशस्त्र प्रहरी बल प्रधान कार्यालय, ईन्टेलिजेन्ट ब्युरो र सशस्त्र प्रहरी ११ नम्बर हेक्वा रौतहटबाट गएको संयुक्त टोलीले ज४ प नम्बरको मोटरसाइकल रोकेर चेकजाँच उनीहरुको साथबाट एक थान नलकटुवा पेस्तोल र तीन थान ७.६२ एमएमको गोली बरामद गरिएको हो । उनीहरूमाथि थप अनुसन्धान भइरहेको सशस्त्र प्रहरीले जनाएको छ ।