सरकार पूरा कार्यकाल चल्छ : सभापति देउवा
काठमाडौँ, ९ कात्तिक । नेपाली कांग्रेसका सभापति एवम् पूर्वप्रधानमन्त्री शेरबहादुर देउवाले सरकारको सय दिनको कामप्रति कांग्रेस सन्तुष्ट रहेको बताउनुभएको छ ।
नेकपा एमाले अध्यक्ष केपी शर्मा ओली नेतृत्वको सरकारले सय दिनमा गरेको कामबाट असन्तुष्टि जनाउनुपर्ने कुनै कारण नरहेको बताउनुभएको हो ।
न्यूज एजेन्सी नेपालसँग कुरा गर्नुहुँदै सभापति देउवाले हनिमुन डेजमा सरकारले राम्रो काम गरेको बताउनुभयो । सभापति देउवाले सबै किसिमबाट सरकारले गति लिएको जानकारी दिनुभयो । उहाँले विपद् व्यवस्थापन र राहत, उद्धारमा सरकारले कामै गरेन भनेर भ्रम फैल्याइएको जिकिर गर्नुभयो ।
सभापति देउवाले भन्नुभयो, ‘‘सरकारको काम राम्रो छ, धेरै कुराले गर्दा राम्रो छ । सय दिनलाई मैले त राम्रो मानेको छु । सय दिनलाई हनिमुन डेज भन्छन् । राम्रो काम गरेको छ । राम्रो काम गरिरहेको छ, के भएको छ त रु गति पनि लिएको छ । बाढी पहिरोमा सरकारले राम्रो उद्धार र खोजी गरेको छ ।’’
राहत तथा खोजि उद्धारमा सरकारले आफ्नो हिसावले सुरक्षाकर्मीहरु तैनाथ गरी व्यवस्थापन गरेको उहाँको भनाइ छ । वर्तमान सरकार पूरा कार्यकाल जाने र एमाले(कांग्रेसको सरकार बनेको दिनदेखि दुई वर्ष प्रधानमन्त्री ओलीले सरकारको नेतृत्व गर्ने र बाँकी डेढ वर्ष आफूले नेतृत्व गर्ने बताउनुभयो । सभापति देउवाले सरकारको कामप्रति असन्तुष्टि हुने कुनै ठाउँ नरहेको जिकिर गर्नुभयो ।
सभापति देउवाले भन्नुभयो, ‘‘मान्छे पठाउनुभएको हो, गरेको हो । हेलिकोप्टरबाट पनि उद्धार गरेको हो । ठिक छ, त्यस्तो केही छैन, सबैको राम्रो छ सय दिनको काम । दुई वर्ष उहाँले चलाउने भनेको हो, डेढ वर्ष मलाई भनेको हो । कहाँ कांग्रेस असन्तुष्ट छ, कसले भन्यो असन्तुष्ट भनेर । कहाँ असन्तुष्ट हुनु, कुरै छैन नि त्यो त ।’’
सभापति देउवाले सानातिना समस्या आफ्नै पार्टीभित्र पनि भइरहने भन्दै अर्को दलसँग मिलेर सरकार बनाउँदा केही समस्याहरु आउनु स्वाभाविक रहेको बताउनुभयो ।
प्रकाशित मिति: ९ कार्तिक २०८१, शुक्रबार
