प्रहरीको घुमुवा हुँ भन्दै ठगी गर्ने सुनिलकुमार पक्राउ
रौतहट । प्रहरीको घुमुवा भनेर ठगी गरेको आरोपमा एक जना पक्राउ परेका छन्।
जिल्ला प्रहरी कार्यालय रौतहटले परोहा नगरपालिका-२ बस्ने ३५ वर्षीय सुनिलकुमार बैठालाई पक्राउ गरेको हो।
उनले घुमुवा प्रहरी हुँ भन्दै सर्वसाधरणसँग रकम असुल गर्न खोजेको, विभिन्न व्यक्तिहरूको जिउ तलासी लिएको प्रहरी अनुसन्धानबाट खुलेको छ ।
अस्थायी प्रहरी पोष्ट जिङगड्वा रौतहटबाट खटिएको टोलीले परोहा-२ लालबकैया पुलबाट पक्राउ गरेको हो।
प्र २–०३–०१९प९५३७ नम्बरको मोटरसाईकल चढेर राजमार्गतर्फ आउँदै गरेका बैठाको झोला जाच गर्ने क्रममा नगद १७ हजार ९ सय पैतिस रुपैया, लागुऔषध नाईट्रोभेट ट्याब्लेट १० पिस, २०० ग्राम लागुऔषध गाजा, मोबाईल थान १ र कोरेक्स बोटल फेला परेको प्रहरीले जनाएको छ ।
उनलाई कार्यालयले पक्राउ गरी थप अनुसन्धान अघि बढाएको छ।
प्रकाशित मिति: २८ आश्विन २०८१, सोमबार
