दशैंको बेला चार प्रदेशका केही स्थानमा पानी पर्ने सम्भावना
काठमाडौं । चार प्रदेशका केही स्थानमा दशैंमा हल्कादेखि मध्यम वर्षाको सम्भावना रहेको छ।
जल तथा मौसम विज्ञान विभाग, मौसम पूर्वानुमान महाशाखाले दशैं विशेष बुलेटिन जारी गर्दै उक्त जानकारी दिएको हो ।
मौसम पूर्वानुमान महाशाखाले सप्तमी, अष्टमीरनवमी र दशमीका दिन गण्डकी, बागमती, कोशी र मधेस प्रदेशका केही भू–भागमा हल्कादेखि मध्यम वर्षा हुने प्रक्षेपण गरेको छ।
आगामी असोज २४, २५ र २६ गते कोशी र मधेस लगायत बागमती र गण्डकी प्रदेशका पहाडी भू–भागमा आंशिकदेखि साधारणतया बदली रहने पूर्वानुमान गरेको छ।
कोशी र मधेस प्रदेशका थोरै स्थानहरूमा तथा बागमती र गण्डकी प्रदेशका पहाडी भू–भागका एक–दुई स्थानमा मेघ गर्जन-चटयाङसहित हल्कादेखि मध्यम वर्षाको सम्भावना रहने महाशाखाले पूर्वानुमान गरेको छ।
बाँकी भू–भागमा आंशिक बदलीदेखि मौसम मुख्यतया सफा रहने देखिएको छ।
प्रकाशित मिति: २३ आश्विन २०८१, बुधबार
