छोरासरह छोरीलाई अंशबन्डा
कालीकोट, असार ५
छोरासरह छोरीलाई समान ठानेर रुप्सा गाविसका एक बासिन्दाले छोराछोरीलाई बराबर अंशबन्डा गरेका छन् ।रुप्सा–३ खलापाटा निवासी सर्जन सहकारीले तीन छोरा र एक छोरीलाई समान अंश प्रदान गरेका हुन।
तीन दाजुभाइकी एक मात्र बहिनी अविसराका नाममा पहिलो पटक जग्गा दिइएको छ ।चार छोरामध्ये ज्येष्ठ पुत्र हर्कबहादुरको सशस्त्र द्वन्द्वमा सहभागी भएका बेला मृत्यु भएको थियो ।
सर्जनका अनुसार सबै छोरा र परिवारको सल्लाहअनुसार छोरीलाई अंशबन्डा गरिएको हो । यसअघि जिल्लामा छोरा नभएको अवस्थामा मात्र छोरीलाई जग्गा जमिन दिने गरिएको थियो ।
उनी रुप्साका मात्र नभई जिल्लाको पहिलो छोरासरह छोरीलाई समान अंश दिने व्यक्ति रहेको बताइएको छ । बिहीबार जिल्ला मालपोत कार्यालय कालीकोटमा जग्गाको कित्ता नं दुई सय ५१ वर्गमि जग्गा उनका नाममा नामसारी गरिएको हो । रासस
प्रकाशित मिति: ५ असार २०७२, शनिबार
