ट्रम्पलाई गोली हान्न १२ घन्टादेखि गल्फ कोर्समा ढुकिरहेका थिए संदिग्ध

वाशिङ्टन डीसी । अमेरिकी पूर्व राष्ट्रपति तथा आगामी राष्ट्रपतिको निर्वाचनमा रिपब्लिकन पार्टीका उमेदवार डोनल्ड ट्रम्पको २ महिनाको अन्तरालमा आइतबार दोस्रो पटक हत्या प्रयास भयो । यस पटक पनि ट्रम्पको भाग्य बलियो थियो । एजेन्टहरूको तत्काल कारबाही गर्दा बन्दुकधारी रायन वेस्ली राउथ ट्रम्पसम्म पुग्न नसकेको अमेरिकाको गुप्तचर सेवाले जनाएको छ ।

सेक्रेट सर्भिसले देख्नु अघि राउथ गोल्फ कोर्स नजिकै १२ घण्टासम्म ढुकेर बसिरहेको एफबीआईले भनेको छ । अमेरिकी सञ्चारमाध्यमले ट्रम्पमाथि आक्रमण गर्ने व्यक्तिलाई रायन वेस्ली राउथको रूपमा पहिचान गरेको थियो । ५८ वर्षीय राउथ अमेरिकाको उत्तरी क्यारोलिना राज्यबाट आएका हुन् । तर ताजा सम्पत्तिसम्बन्धी कागजातअनुसार उनी हाल अमेरिकाको हवाईका बासिन्दा हुन् । राउथलाई आज अर्थात मंगलबार अदालतमा पेश गरिदैंछ ।

एफबीआईले राउथको सामाजिक सञ्जालमा पनि हेरेको थियो । यसबाट उनले रुससँग चलिरहेको युद्धमा युक्रेनलाई सहयोग गरिरहेको पाइयो। यसबाहेक विगतमा उनको आपराधिक रेकर्ड पनि छ । राउथमाथि आइतबार फ्लोरिडास्थित ट्रम्प इन्टरनेशनल गल्फ कोर्समा एके –४७ जस्तो देखिने बन्दुक लिएर गएको आरोप छ । एफबीआईले गल्फ कोर्सको झाडीबाट हतियार, एउटा स्कोप, दुईवटा झोला र एउटा गो–प्रो क्यामेरा पनि बरामद गरेको थियो ।