उत्तर प्रदेशको बहराइचमा ब्वाँसोको आक्रमणबाट ११ वर्षीया बालिका घाइते
नयाँ दिल्ली । भारतको उत्तर प्रदेश राज्यको बहराइचमा मङ्गलवार राति ११ वर्षीया एक बालिकालाई ब्वाँसोले आक्रमण गरेको छ । अस्पतालमा भर्ना भएकी बालिकाको अवस्था स्थिर रहेको बताइएको छ ।
‘किशोरी अहिले ठीकै छिन् । गाउँका जनता सजग बनेर निरन्तर अनुगमन गरिरहेका छन् । त्यही भएर ब्वाँसोले आक्रमण गर्न बित्तिकै मानिसहरूले त्यसलाई भगाइदिए अनि किशोरी बाचिन्’ बहराइच डीपीआरओ राघवेन्द्र द्विवेदीले भनेका छन् ।
गएको सात दिनयता एकपछि अर्को गर्दै ब्वाँसाहरू समातिएपछि कुनै आक्रमण भएको थिएन । हिजो फेरि अर्को ब्वाँसा समातिएको उनले बताए । उत्तर प्रदेशको बहराइच जिल्लाको एउटा क्षेत्रमा ६ वटा ब्वाँसोले आतङ्क मच्चाइरहेका थिए ।
मङ्गलवार बिहान वन विभागले पाँचवटा ब्वाँसा समातेको भए पनि एउटा अझै खुल्ला हिँडिरहेको छ । यो क्षेत्र नेपाल–भारत सीमामा जोडिएको तराई अञ्चलको भएको बताइएको छ ।
यहाँ ब्वाँसाको समूहले साना बालबालिकाहरूलाई निशाना बनाइरहेका छन् । जुलाई र अगस्ट महिनामा ब्वाँसोको आक्रमणमा ६ जना बालबालिकाको मृत्यु भएको थियो भने २६ जना घाइते भएका छन् ।
प्रकाशित मिति: २६ भाद्र २०८१, बुधबार
