सत्ता गुमेपछि जनताको साथ खोज्दै प्रचण्ड

काठमाडौँ । सत्ता गुमेपछि नेकपा माओवादी केन्द्र जनताको साथ खोज्दैछ । करिब १० वर्षपछि बाध्यतावश प्रतिपक्षमा पुगेको माओवादीले जनता सम्झिन थालेको हो ।

दुई ठुला दल नेपाली कांग्रेस र नेकपा एमालेको समर्थनमा पुष्पकमल दाहाल ‘प्रचण्ड’ तेस्रोपटक प्रधानमन्त्री बनेर झण्डै १९ महिना शासन गरे । असार १७ गते एमालेका अध्यक्ष केपी ओली र कांग्रेसका सभापति शेरबहादुर देउवाबिच ७ बुँदे सहमति भएपछि उनी सत्ताच्युत भएका थिए ।

लामो समयपछि प्रतिपक्षमा पुग्दा माओवादी नेता तथा कार्यकर्ता अब पार्टी सङ्गठन चलायमान हुने अपेक्षासहित खुसी भए पनि अध्यक्ष प्रचण्ड सन्तुष्ट नदेखिएको उनका अभिव्यक्तिबाट प्रस्ट झल्किन्छ । भदौ ११ गते प्रमुख प्रतिपक्ष दलका नेताको हैसियतमा संसदको रोष्टममा पुगेका उनले सरकारको भूमिका र खासगरी प्रधानमन्त्री ओलीमाथि निकै आक्रोश व्यक्त गरे । यद्यपि आफ्नो अभिव्यक्ति कुनै व्यक्तिगत कुण्ठा नभइ सरकारमाथि खबरदारी भएको उनले दाबी गरे ।