हमासले बन्धक बनाएका ६ जनाको शव भेटियो
एजेन्सी । हमासले इजरायलबाट बन्धक बनाएर लगेकामध्ये ६ जनाको शव फेला परेको छ ।
हमासको नियन्त्रणमा रहेकामध्ये एक अमेरिकी–इजरायली नागरिक हर्स गोल्डबर्ग पोलिनलगायतको शव पहिचान भएको हो।
पोलिनलाई गएको वर्ष अक्टोबर ७ मा नोवा संगीत महोत्सवबाट अपहरण गरिएको थियो । पोलिनसँगै सुरुङभित्र फेला परेका अन्य व्यक्ति पनि नोवा संगीत महोत्सवबाट अपहरण गरिएका थिए।
ती व्यक्तिहरूमा ३२ वर्षका एलेक्स लोबानोभ, २४ वर्षका इडेन येरुशाल्मी, २५ वर्षका ओरि डानिनो र २७ वर्षका अलमोग सारुसी छन् ।
साथै ४० वर्षकी कारमेल गाटलाई पनि हमासका लडाकुहरूले किब्बुट्ज बेएरीबाट अपहरण गरेका थिए । उनी आफ्ना अभिभावकसँग भेटघाट गर्न गएकी थिइन्।
पोलिनलगायत अन्य इजरायली नागरिक अपहरणमा परेपछि उनीहरूको परिवारले इजरायलका प्रधानमन्त्री बेन्जामिन नेतन्याहूलाई बन्धकहरूको रिहाइका लागि सम्झौता गर्न दबाब दिँदै आएका थिए ।
गाजाको दक्षिणी शहर रफाहको सुरुङभित्र यी शवहरू फेला परेको इजरायली सेनाका प्रवक्ता हागारीले बताए । गाजामा जारी युद्धको कारण ४० हजार भन्दा बढी प्यालेस्टिनी मारिएका छन् ।
यस घटनापछि नेतन्याहूको नेतृत्वमा इजरायली सेनाले हमासविरुद्धको युद्धलाई अझै कडा पार्ने संकेत दिएको छ । बन्धक परिवारहरूको दबाब र नेतन्याहूको अडानबीच तनाव बढ्दै गएको हो ।
प्रकाशित मिति: १६ भाद्र २०८१, आइतबार
