पोखरीमा डुबेर दाजु–बहिनीको मृत्यु
खोटाङ, भदौ ११ । पोखरीमा डुबेर खोटाङमा एकै घरका दाजु–बहिनीको मृत्यु भएको छ ।
हलेसी तुवाचुङ नगरपालिका वडा नम्बर–३ बाङाका गईन्द्र राईका ६ वर्षीय छोरा संगम राई र तीन वर्षीया छोरी सम्वृद्धि राईको सिँचाई पोखरीमा डुवेर मृत्यु भएको हो ।
सोमबार दिउँसो करिब २ बजेतिर घरबाट हराएका संगम र संवृद्धिलाई उनीहरुकी आमा ममता राईले साँझ करिब ५ः४५ बजेतिर घरदेखि केही टाढा रहेको भुतिया खोला नजिकैको सिँचाई पोखरीमा डुबिरहेको अवस्थामा फेला पारेकी थिइन् ।
सामान्य रूपमा हात खुट्टा चलाइरहेको अवस्थामा उद्धार गरेर घरमा ल्याएको केही समयमा नै बच्चाहरु मृत्यु भएको प्रहरीले जनाएको छ ।
प्रहरीले घटनाबारे थप अनुसन्धान अगाडि बढाएको जिल्ला प्रहरी कार्यालय खोटाङबाट प्रहरी नायब उपरीक्षक पुरुषोत्तम खड्काले बताए ।
बच्चाहरूका बुबा गईन्द्र भने हाल रोजगारीका लागि विदेशमा रहेका छन् ।
प्रकाशित मिति: ११ भाद्र २०८१, मंगलबार
