ओडीआई वरियतामा नेपाल एक स्थान माथि उक्लियो
काठमाडौं, भदौ ६ । नेपाल ओडीआई वरियतामा एक स्थान माथि उक्लिँदै १६औं स्थानमा उक्लिएको छ ।
वरियतामा क्यानडा २ स्थान तल झर्दा नेपालले वरियतामा एक स्थान सुधार गरेको हो ।
अन्तर्राष्ट्रिय क्रिकेट परिषद्(आइसीसी) ले निकालेको पछिल्लो वरियताक्रममा नेपाल १६ औँ स्थानमा उक्लिँदा क्यानडा १८ औं स्थानमा झरेको छ । नेपाल सयअघि १७ औँ स्थानमा थियो ।
क्यानडाले यूएईमा केही महिना अघि भएको लिग टु अन्तर्गतको त्रिकोणात्मक सिरिजमा शतप्रतिशत नतिजा निकाल्दै नेपाललाई वरियतामा पछि पारेको थियो । तर नेदरल्यान्ड्समा भइरहेको त्रिकोणात्मक सिरिजको चारै खेलमा पराजित भएपछि क्यानडाको वरियता खस्किएको हो ।
एसोसिएट तर्फको शीर्ष स्थानमा स्कटल्यान्ड रहेको छ । नेपाल भन्दा अघि रहेका एसोसिएट राष्ट्रमा स्कटल्यान्ड, नेदरल्यान्ड्स र नामिबिया रहेका छन् । ओडीआई वरियताको शीर्ष स्थानमा भारत, दोस्रो स्थानमा अस्ट्रेलिया र तेस्रो स्थानमा दक्षिण अफ्रिका छन् ।
टी ट्वान्टीआईतर्फ भने नेपाल १७ औँ स्थानमा कायमै रहेको छ । टी ट्वान्टीआईको शीर्ष स्थानमा भारत छ ।
प्रकाशित मिति: ६ भाद्र २०८१, बिहिबार
