‘संसदीय मामिला’ सांसदको मुख्य जिम्मेवारी : सभामुख घिमिरे

काठमाडौँ ५ भदौ। सभामुख देवराज घिमिरेले ‘संसदीय मामिला’ सांसदको मुख्य जिम्मेवारी हो भनेर महसुस गर्ने गरी काम गर्न संसद्मा प्रतिनिधित्व गर्ने दलका प्रमुख सचेतकहरूलाई आग्रह गर्नुभएको छ ।

प्रमुख सचेतकहरूसँग आज भएको छलफल उहाँले संसद् बैठक नभएका दिन संसदीय समितिका बैठक गरेर विचाराधीन विधेयकलाई निष्कर्षमा पुर्‍याउन प्रमुख सचेतकहरूले ख्याल गर्नुपर्ने बताउनुभयो ।

बैठकमा भएको छलफलबारे जानकारी दिँदै नेकपा(एमाले) का मुख्य सचेतक महेश बर्तौलाले भोलि भदौ ६ गते बिहान ११ः३० बजे कार्यव्यवस्था परामर्श समितिको बैठक बोलाइएको बताउनुभयो ।

भोलिको प्रतिनिधिसभाको बैठकमा प्रधानमन्त्रीसँग सांसदहरूको प्रश्नोत्तर गर्ने कार्यसूची रहेको बताउँदै उहाँले यस कार्यक्रमलाई मर्यादित, व्यवस्थित र प्रभावकारी बनाउनका लागि भूमिका निर्वाह गर्न सभामुखले आग्रह गर्नुभएको बताउनुभयो ।

बैठकमा प्रतिनिधिसभाको आगामी बैठक भदौ ११, १२, १३ गते गर्ने गरी प्रस्ताव गरिएको छ । यसैगरी प्रत्येक १५ दिनमा संसद् बैठकको कार्यतालिका बनाएर प्रभावकारी रुपमा सञ्चालन गर्ने गरी छलफल भएको मुख्य सचेतक बर्तौलाले बताउनुभयो ।

संसदीय समितिमा विभिन्न विधेयक विचाराधीन अवस्थामा सभामुख घिमिरेले समितिले निर्णयार्थ काम गर्ने गरी संसदीय समितिका बैठकलाई पनि प्रभावकारी बनाउन आग्रह गर्नुभएको थियो ।