माधव नेपालको प्रश्न – देशमा दुई दलीय शासन ल्याउन खोजेको हो ?
काठमाडौं । नेकपा एकीकृत समाजवादीका अध्यक्ष माधवकुमार नेपालले दुई दलीय व्यवस्था ल्याउन नदिने बताएका छन्।
संक्रमणकालीन न्यायसम्बन्धी विधेयकमाथि संसदमा भइरहेको छलफलमा सहभागी हुँदै अध्यक्ष नेपालले यस्तो बताएका हुन् ।
उनले दुई दलीय व्यवस्था नेपाली जनताका लागि स्वीकार्य नहुने बताए ।
अध्यक्ष नेपालले भने, ‘प्रधानमन्त्रीले के कुरा ल्याउनुभयो भनेदेखि अहिले त हामीले संविधान संशोधन गर्न खोजिरहेका छौँ । क्या मिठा कुरा छ । अनि मध्यरातमा हस्ताक्षर गर्ने हो ? दुई दलीय शासन ल्याउन खोजेको हो ? दुई दलीय शासन नेपालमा आउन सक्दैन । हामी आउन दिँदैनौँ ख्याल गर्नुस्, दुई दलीय शासनको कुराले देशलाई नोक्सान पुर्याउँछ । कोही सहनेवाला छैनन् ।’
उनले संविधान संशोधनमार्फत देशमा दुई दलीय व्यवस्था ल्याउन खोजिएको भन्दै दुई दलीय शासनको कुराले देशलाई नोक्सान पुर्याउने दाबी गरे ।
बंगलादेशको घटनाले सबैलाई सचेत बनाएको भन्दै कुनै किसिमको तानाशाही नेपालमा चल्न नसक्ने अध्यक्ष नेपालको भनाइ छ ।
उनले नेपाली जनतालाई प्रतिगमन र अधिनायकवाद स्वीकार्य नभएको स्पष्ट पारे ।
प्रकाशित मिति: ३० श्रावण २०८१, बुधबार
