काभा बिच भलिबल : नेपाली टोलीको दोस्रो जित

काठमाडौँ १८ साउन। नेपाली पुरुष टोलीले भुटानमा जारी काभा बिच भलिबल च्याम्पियनसिपमा लगातार दोस्रो जित हासिल गरेको छ ।

थिम्पुस्थित चाङ्लिमिथाङ राष्ट्रिय रङ्गशालामा शुक्रबार भएको खेलमा नेपालले उज्बेकिस्तानविरुद्ध २–० को सोझो सेटमा जित निकाल्यो ।

मानबहादुर श्रेष्ठ र दिलबहादुर सुनारको जोडीले शुक्रवारको पहिलो खेलमा घरेलु टोली भुटानलाई २१–१४, २१–१४ ले पाखा लगाएको थियो । दोस्रो खेलमा यही जोडीले उज्बेकिस्तानलाई २१–१५, २१–१४ ले पाखा लगायो ।

बिहीबार भएको पहिलो खेलमा भने माल्दिभ्ससँग नेपाल १६–२१, १५–२१ ले पराजित भएको थियो । उता नेपाली महिला टोलीले पनि लगातार दोस्रो जित दर्ता गरेको छ ।

थिम्पुस्थित चाङ्लिमिथाङ राष्ट्रिय रङ्गशालामा शुक्रबार नेपालले घरेलु टोली भुटानविरुद्ध २–० को सोझो सेटमा जित निकाल्यो । कमला पुन र मनिषा चौधरीको जोडीले एकतर्फी खेल २१–५, २१–४ ले आफ्नो पक्षमा पार्यो ।