कञ्चनपुरमा बाघ नियन्त्रण लिने प्रयास जारी
कञ्चनपुर, साउन १८ । कञ्चनपुरको दोधारा चाँदनी नगरपालिका–२ कमलशा टोलमा आक्रमण गरेर महिलाको ज्यान लिने बाघलाई नियन्त्रणमा लिने प्रयास दोस्रो दिन पनि जारी राखिएको छ ।
बाघलाई नियन्त्रणमा लिनका लागि बिहीबार ४ घण्टासम्मको प्रयास असफल भएपछि शुक्रबार बिहानैदेखि पुनः हात्तीसहित प्राविधिक परिचालन गरिएको हो ।
बिहीबार राति निकुञ्जका कर्मचारी र सुरक्षाकर्मी पहरा दिएर उखुबारीनजिकै बसेका थिए । बाघलाई अल्झाउन उखुबारीमा पाडो पनि बाँधिएको थियो ।
बिहीबार पूरै उखुबारीलाई कपडाले घेरेर ४ वटा हात्ती र लोडरको सहायताले बाघलाई नियन्त्रणमा लिने ४ घण्टासम्मको प्रयास असफल भएको थियो ।
आज एक हात्ती थपिएर बाघ नियन्त्रणमा लिने कार्य जारी राखिएको छ । बाघलाई डार्ट गरेर नियन्त्रणमा लिनका लागि बर्दिया राष्ट्रिय निकुञ्जको प्राविधिक टोली आएको छ ।
बिहीबार बिहान घरनजिकैको खेतबारीमा घाँस काटिरहेकी २६ वर्षीया हिरादेवी शाहको बाघको आक्रमणबाट मृत्यु भएको हो ।
प्रकाशित मिति: १८ श्रावण २०८१, शुक्रबार
