माओवादी अध्यक्ष प्रचण्डले भने – आगामी निर्वाचन एक्लै लडेर जित्छौं, भ्रष्टहरूलाई फेरि बढार्छौं

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले २०८४ को निर्वाचनमा एक्लै चुनाव लडेर जित्ने दावी गरेका छन्।

पार्टी केन्द्रीय कार्यालय पेरिसडाँडामा आयोजित पार्टी प्रवेश कार्यक्रममा बोल्दै अध्यक्ष प्रचण्डले यस्तो बताएका हुन् ।

उनले ०८४ को निर्वाचन एक्लै लड्ने र जित्ने योजनाका साथ छलफल भइरहेको बताए।

अध्यक्ष प्रचण्डले भने,‘पार्टीको पदाधिकारी बैठक चलिरहेको छ। बैठकमा २०८४ को चुनाव एक्लै लड्ने र जित्ने योजनाका साथ छलफल चलिरहेको छ। यस्तो महत्वपूर्ण समयमा तपाईहरू पार्टीमा आउनुभएको छ। यसले फेरि माओवादीलाई शक्तिशाली बनाएर देशमा सुशासन कायम गर्न महत्त्वपूर्ण सन्देश दिनेछ।’

उनले १८ महिना सरकारको नेतृत्त्वमा रहँदा सुशासन, सामाजिक न्यायका पक्षमा अहोरात्र काम गरेको बताए। आफुहरुले असार २८ गते सरकार छोड्दा पनि आफुहरु विजयी भएर निस्किएको अध्यक्ष प्रचण्डको भनाई छ ।

उनले आफुहरु सुशासनका पक्षमा विजय भएर सरकारबाट निस्किएको बताए ।

भ्रष्टहरू मिलेर सरकार बनाएको कुरा बच्चा बच्चालाई पनि थाहा भएको भन्दै यो कुरा जनतालाई पनि बुझाउन जरूरी रहेको बताए ।