शेखर पक्षले खोज्यो प्रदेश सरकारमा भाग
![](https://www.deshkonews.com/wp-content/uploads/2024/06/shekhar-koirala--scaled.jpg)
काठमाडौं । नेपाली कांग्रेसको शेखर कोइराला पक्षले प्रदेशमा गठन हुने नयाँ सरकारमा पार्टीभित्रको सन्तुलनलाई लिएर प्रश्न उठाएको छ । सरकार गठन र पार्टीबाट पठाउने मन्त्रीहरूबारे आफूसँगै कुनै छलफल नगरेपछि कोइराला पक्षले असन्तुष्टि जनाएको हो ।
प्रदेश सरकार गठन र आफ्नो समूहको सहभागिताबारे कोइराला पक्षका नेताहरूबीचमंगलबार दिउँसो विशालनगरस्थित कोइरालाको सम्पर्क कार्यालयमा छलफल भएको थियो । जहाँ उपसभापति धनराज गुरुङ, महामन्त्री गगन थापा र लुम्बिनी प्रदेश सभापति अमरसिंह पुन सहभागी थिए ।
बैठकले कोसीमा दुई, वाग्मतीमा तीन, गण्डकीमा दुई, लुम्बिनीमा दुई, कर्णालीमा एक र सुदूरपश्चिममा एकजना मन्त्री आफ्नो समूहले पाउनुपर्ने निष्कर्ष निकालेको छ ।
बैठक सकिएलगत्तै कोइरालाले सभापति देउवालाई फोन गरेर आफ्नो समूहको धारणा सुनाएका थिए । तर, बुधबार साँझसम्म देउवाले कुनै जवाफ नदिएको एक पदाधिकारीले जानकारी दिए ।
ती पदाधिकारीका अनुसार विभिन्न प्रदेशमा भइरहेको सरकार गठनबारे सञ्चार माध्यममा आएका समाचारबाहेक कोइराला पक्ष पूरै बेखबर छ ।
प्रकाशित मिति: १० श्रावण २०८१, बिहिबार