महिला एसिया कप : आज नेपालले पाकिस्तानविरुद्ध खेल्दै
काठमाडौं, साउन ६ । एसीसी महिला एसिया कप क्रिकेटमा नेपालले दोस्रो खेलमा आइतबार पाकिस्तानसँग प्रतिस्पर्धा गर्दैछ ।
नेपाल र पाकिस्तानको भिडन्त श्रीलंकाको डम्बुला मैदानमा आइतबार साँझ ७ः१५ बजे सुरु हुँदैछ ।
पहिलो जितले उत्साहित नेपाल बलियो प्रतिद्वन्द्वीविरुद्ध मैदानमा उत्रिनेछ भने पाकिस्तान पहिलो जितको खोजीमा हुनेछ ।
आजै हुने समूह ‘ए’ को अर्को खेलमा यूएईले भारतको सामना गर्दैछ । यो खेल आइतबार दिउँसो २ः१५ बजे सुरु हुनेछ ।
प्रतियोगितामा आठ टोली सहभागी छन् । दुई समूहमा विभाजन गरिएको प्रतियोगितामा नेपाल समूह ‘ए’ मा छ । नेपालको समूहमा भारत र पाकिस्तान र यूएई छ ।
अहिलेसम्म समूह चरणका एकएक खेल सम्पन्न भइसकेका छन्। समूह ‘ए’मा समान दुई अंकसहित भारत र नेपाल पहिलो र दोस्रो स्थानमा छन् भने पाकिस्तान र यूएईले खाता खोल्न सकेका छैनन्।
समूह ‘बी’ मा श्रीलंका, बंगलादेश, मलेसिया र थाइल्यान्ड छन् । श्रीलंका र थाइल्याण्ड दुई अंकसहित पहिलो र दोस्रो स्थानमा छन् भने बंगलादेश र मलेसियाले खाता खोल्न सकेका छैनन्।
समूह चरणमा हुने १२ खेलबाट उत्कृष्ट दुईदुई देश सेमिफाइनल पुग्नेछन्। सेमिफाइनलमा विजयी दुई टोलीबिच फाइनल भिडन्त साउन १३ गते हुनेछ ।
प्रकाशित मिति: ६ श्रावण २०८१, आइतबार
