सुमेरु सहकारीका कोषाध्यक्ष र सदस्य पक्राउ

काठमाडौं । सुमेरु बचत तथा ऋण सहकारी संस्था, कालिमाटीका दुई सञ्चालकलाई प्रहरीले पक्राउ गरेको छ ।

उनीहरुलाई प्रहरीको केन्द्रीय अनुसन्धान ब्यूरो (सीआईबी)ले पक्राउ गरेको हो ।

कोषाध्यक्ष रामकृष्ण अवाले र सदस्य सरोज महर्जन गत ३० असारमा पक्राउ परेका हुन् ।

उनीहरुविरुद्ध ५८ जना सदस्यको १५ करोड रुपैयाँ ठगी भएको भनेर जाहेरी परेको प्रहरीले जनाएको छ ।

ललितपुरको सुमेरु सहकारी चलाउने भरत महर्जनकै समूहले सो सहकारी चलाएको थियो ।

यसमा भरतकी श्रीमती राजमाया महर्जन अध्यक्ष थिइन् । उनी भरतसँगै हाल फरार छन्।

भरत महर्जन सहकारीको एक अर्ब भन्दा धेरै रकम लिएर हाल बेलायत भागेका छन् ।

अनुसन्धानमा ढिलाई गरी प्रहरीले नै उनलाई भगाउन सहयोग गरेको थियो ।

जसकारण हजारौं पीडितहरु हाल समस्यामा छन् ।

कालिमाटी शाखाबाट मात्रै करिब दुई अर्ब हिनामिना भएको छ ।