स्लोभाकियामा रेल र बस ठोक्किँदा सातको मृत्यु

स्लोभाकिया । दक्षिणी स्लोभाकियामा बिहीबार रेलवे क्रसिङमा यात्रुवाहक रेल र बस ठोक्किँदा सात जनाको मृत्यु र अन्य पाँच जना घाइते भएको उद्धारकर्मीहरूले बताएका छन् ।

दुर्घटना स्थानीय समयानुसार साँझ पाँच बजेपछि दक्षिण–पश्चिमी सहर नोभे जम्की नजिकै भएको सिटिके समाचार एजेन्सीले बताएको छ ।

रेलवेका प्रवक्ता भ्लादिमिरा बाहिलोभाका अनुसार युरोसिटी रेल प्रागबाट बुडापेस्टतर्फ गइरहेको थियो । स्लोभाक उद्धार सेवाले छ मृतकको अघिल्लो सङ्ख्यालाई अद्यावधिक गर्दै भनेको छ, “सात जनाको मृत्यु भएको छ, पाँच जना घाइते भएका छन् ।”

उद्धार सेवाका प्रवक्ता पेट्रा क्लिमेसोभाले घाइतेहरूलाई ‘तत्काल चिकित्सकीय सहायता’ आवश्यक रहेको बताउनुभयो । 

बाहिलोभाले रेलका चालक लोकोमोटिभमा आगो लागेका कारण जलेको बताउनुभयो । उहाँले बाधाहरूले सुरक्षित र प्रकाश सङ्केतले सुसज्जित भएको रेलवे क्रसिङमा दुर्घटना भएको जानकारी दिनुभयो । 

गृहमन्त्री माटुस सुताज एस्टोक पछि दुर्घटनास्थलमा पुग्नुभयो । उहाँले दुर्घटनाको कारण प्राविधिक वा मानवीय विफलता थियो भन्नेबारे स्पष्ट नभएको पत्रकारहरूलाई बताउनुभयो । 

स्थानीय सञ्चारमाध्यमहरूले आकाशमा बाक्लो धुँवा उडिरहेको र आंशिकरूपमा आगो लागेको रेलका साथमा सामान बोकेका यात्रुहरूको भिडियो फुटेज प्रसारण गरेका छन् ।