बजेट निर्माणमा कर्मचारीहरुले गडबड गरेको मधेशका मुख्यमन्त्री सिंहको दाबी
जनकपुरधाम । मधेश प्रदेशका मुख्यमन्त्री सतिशकुमार सिंहले बजेटमा कर्मचारीहरुले गडबड गरेको दाबी गरेका छन् ।
समाजवादी प्रेस संगठन धनुषाले आयोजना गरेको एक अन्तरक्रिया कार्यक्रममा बोल्दै मुख्यमन्त्री सिंहले यस्तो बताएका हुन् ।
मुख्यमन्त्री सिंहले बजेटमा कर्मचारीले गरेको गडबड बारे छानबिन गर्ने बताए ।
मुख्यमन्त्री सिंहले भने, ‘सरकार बनेको ८ दिनमै बजेट ल्याएँ । म भन्न चाहन्छु । नेतामात्र परिवर्तन भयो, बनेको बजेटमा कर्मचारीले खेल गरे । धेरै बजेट यताउता भयो । यसबारे आन्तरिक छानबिन गरिरहेका छौं ।’
६ दलको गठबन्धनमा २५ जेठमा मुख्यमन्त्री बनेका सिंह नेतृत्वको सरकारले असार १ गते अगामी आर्थिक वर्षका लागि ४३ अर्ब ८९ करोड २१ लाख ७० हजार रूपैयाँको बजेट ल्याएको थियो ।
बजेटमा कर्मचारीले गडबड गरेको विषयमा छानबिन गरेर उजागर गर्ने मुख्यमन्त्री सिंहको भनाइ छ । मुख्यमन्त्री सिंहले आफ्नो नेतृत्वको सरकार ‘मिडिया फ्रेन्डली’ भएको दाबी गरे ।
उनले लोककल्याणकारी विज्ञापन, पत्रकारको बीमा र खोजपत्रकारिताका लागि बजेट विनियोजन गरेको बताए ।
प्रकाशित मिति: १० असार २०८१, सोमबार
