प्रतिनिधिसभाबाट आज बजेट पारित गर्ने तयारी, कांग्रेसको ह्वीप
काठमाडौँ, असार ९ । प्रतिनिधिसभाबाट आज विनियोजन विधेयक २०८१ पारित गर्ने तयारी गरिएको छ।
संसद् सचिवालयले सूचना जारी गर्दै बिहान ११ बजे बस्ने बैठकमा अर्थमन्त्री वर्षमान पुनले विनियोजन विधेयक २०८१ लाई पारित गरियोस् भनी प्रस्ताव पेस गर्ने जनाएको हो ।
त्यसअघि मन्त्रीले विनियोजन विधेयकमाथिको छलफलमा उठेको प्रश्नको जवाफ दिने कार्यसूची छ ।
सरकारले आजै बजेट पारित गर्ने तयारी गरेपछि नेपाली कांग्रेस संसदीय दलले भने सांसदहरुलाई अनिवार्य रुपमा सदनमा उपस्थित हुन ह्वीप जारी गरेको छ ।
पार्टीले यसअघि शुक्रबार बसेको संसदीय दलको बैठकमा पनि बजेट पारित नहुञ्जेलसम्म अनिवार्य बैठकमा उपस्थिति हुन सांसदहरुलाई निर्देशन दिएको थियो ।
पार्टीले बजेट असन्तुलित, पक्षपाती र पूर्वाग्रहपूर्ण रहेको आरोप लगाउँदै आएको छ ।
प्रकाशित मिति: ९ असार २०८१, आइतबार
