सरस्वती प्रतीक्षाको उपन्यास ‘स्व’ सार्वजनिक

काठमाडौँ, १ असार । सरस्वती प्रतीक्षाद्वारा लिखित उपन्यास ‘स्व’ सार्वजनिक भएको छ ।

‘बुकहिल पब्लिकेसन प्रालि’ले यहाँ आज आयोजना गरेको कार्यक्रममा लेखिकाद्वय प्रतीक्षा र सगुना शाह तथा लेखक घनश्याम खड्काले संयुक्त रूपमा उक्त उपन्यास सार्वजनिक गर्नुभएको हो ।

उपन्यासमा वर्तमान मानिसभित्रका बेचैनी, अशान्ति, बेखुसी र अन्तरद्वन्द्वका एक र अनेक कथा तथा आफू आफैँसँग नहुँदा र आफू–आफूजस्तो नहुँदाका घटना तथा दुर्घटनालाई समावेश गरिएको छ ।

“मूल कथामा बौद्धमार्गप्रतिको प्रेम छ, तथापि मौलिक अनुभव र अनुभूतिको बलमा आफूले आफैँलाई खोजिरहँदाका आरोह–अवरोहले उपन्यासको कथालाई चित्ताकर्षण र बलियो बनाएको छ”, लेखिका प्रतीक्षाले भन्नुभयो । उपन्यास पढ्दै गर्दा हरेक पाठकले आफूलाई उपन्यासको मात्रै नभई अस्तित्व–खोजको नायकका रूपमा पाउने उहाँको भनाइ थियो ।

लेखकद्वय शाह र खड्काले सरल भाषाशैली, कथाको प्रस्तुतीकरण र शिल्पसहितको लेखनका कारण ‘स्व’ उपन्यासले पाठकको मन जित्न सफल हुने विश्वास व्यक्त गर्नुभयो । यसअघि लेखिका प्रतीक्षाको ‘नथिया’ उपन्यास सार्वजनिक भएको थियो ।