सुडानको अल–फाशरमा भएको झडपमा २२० भन्दा बढीको मृत्यु
सुडान । सुडानको अल–फाशरमा भएको झडपमा दुई सय २० भन्दा बढीको मृत्यु भएको छ । अल–फाशर अर्धसैनिक बल र्यापिड सपोर्ट फोर्सको नियन्त्रणबाहिर रहेको डार्फरको अन्तिम सहर हो ।
साथै यो सहर सुडानी सेनाले पूर्व डेपुटी कमान्डर मोहम्मद हमदान डाग्लोको नेतृत्वको आरएसएफविरुद्ध लडिरहेको करिब एक वर्ष लामो युद्धको केन्द्रविन्दु बनेको छ ।
अनिकालको सङ्घारमा रहेको क्षेत्रमा मानवीय सहायताका लागि महत्त्वपूर्ण मानिने सहरका लागि लडाइँ एक महिनाभन्दा लामो भइसकेको छ ।
परोपकारी संस्था मेडिसिन्स सेन्स फ्रन्टियर्स (एमएसएफ) ले अल–फाशरमा भएको लडाइँमा कम्तीमा दुई सय २६ जना मारिएको र एक हजार चार सय १८ जना घाइते भएको बताएको छ ।
समग्र मृत्यु हुनेको सङ्ख्या अझ बढी रहेको अनुमान गरिएको छ । यद्यपि जारी हवाई आक्रमण, गोलाबारी र स्थल लडाइँका कारण घाइतेहरूले उपचार पाउन सकिरहेका छैनन् ।
एमएसएफका आपत्कालीन कार्यक्रमका प्रमुख मिसेल–ओलिभियर लाचाराइटले भन्नुभयो, “अल–फाशरमा अवस्था अराजक बनेको छ ।”
अवस्था जटिल बन्दा मुख्यरूपमा प्रसूति सुविधा भएको दक्षिणी अस्पताल बन्द हुँदा मानिसहरू साउदी अस्पतालमा उपचार गर्न बाध्य भएका छन् ।
मे १० मा अल–फाशरमा तीव्र लडाइँ सुरु भएपछि आरएसएफले घेराबन्दी गर्दा लाखौँ नागरिक फँसेका छन् । बिहीबार संयुक्त राष्ट्रसङ्घीय सुरक्षा परिषद्ले घेराबन्दी अन्त्य गर्न माग गर्दै प्रस्ताव पारित गरेको छ ।
यसैबीच पश्चिमी डार्फरको राजधानी अल–जेनिनामा १० हजारदेखि १५ हजारको बीचमा ज्यान गएको राष्ट्रसङ्घीय अनुमान छ । राष्ट्रसङ्घका अनुसार सन् २०२३ अप्रिलमा सुडानका सेनाप्रमुख अब्देल फतह अल–बुरहान र डाग्लोको आरएसएफबीच सुरु भएको द्वन्द्वमा हजारौँ मानिसको मृत्यु भएको छ र ९० लाखभन्दा बढी मानिस विस्थापित भएका छन् ।
सुरक्षा परिषद्को पछिल्लो प्रस्तावमा सुडानमा तत्काल युद्धविराम, निर्बाध मानवीय पहुँच र हतियार प्रतिबन्धको पालना गर्न आह्वान गरिएको छ । यो रमजानसँगै मार्चमा यसअघिको असफल युद्धविरामको आह्वानपछि भएको हो ।
प्रकाशित मिति: ३२ जेष्ठ २०८१, शुक्रबार
