काठमाडौं महानगरपालिकाद्वारा सिंहदरबारबाट चार बालश्रमिकको उद्धार

काठमाडौं । काठमाडौं महानगरपालिकाले सिंहदरबारभित्रै चार जना बालश्रमिकको उद्धार गरेको छ । बुधवार सिंहदरबार भित्रका विभिन्न खाजा घरमा काम गर्ने चार बालश्रमिकलाई महानगरपालिकाले अनुगमन गरी चार बालश्रमिक उद्धार गरेको हो ।

काठमाडौ महानगरपालिका मेयरका सचिवालय सदस्य धिरज जोशीले सिंहदरबारभित्रका विभिन्न क्यान्टिनमा काम गर्ने दुई बालक र दुई बालिकालाई उद्वार गरिएको बताउनुभयो । उहाँले चार जना बालबालिकामध्ये तीन जनाको नागरिकता नभएको र एक जनाको नागरिकतामा १६ वर्ष उमेर भन्दा कम देखिएको बताउनुभयो ।

उहाँले महानगर पालिकाले काठमाडौं महानगरभित्र हुने बाल शोषणलाई अन्त्य गर्नको लागि सिंहदरबार तथा व्यक्तिको घरमा काम गर्ने बालबालिकालाई उद्धार गर्ने बताउनु भयो । उहाँले देशको सबै भन्दा ठूलो प्रशासनिक केन्द्र जहाँ नागरिकता नलिई छिर्न नपाउने प्रशासनिक क्षेत्रमा नागरिकता नबनेका कलिला बच्चाहरुलाई काममा लगाएको पाइएको बताउनु भयो ।

उहाँले भारतीय बालबालिका थिए भन्ने गुनासो आएपनि अनुगमनका क्रममा नभेटिएको बताउनुभयो । उहाँले बालश्रम बिरुद्ध महानगरपालिका निरन्तर लागि रहने बताउनुभयो ।

उहाँले महानगरपालिका बालबालिकाको हकलाई लिएर गम्भिर रहेको बताउनुभयो । उहाँले दिनभरी काम गर्नुपर्ने र विद्यालय जान नपाउने भन्ने खबर आएपछि उनीहरुलाई उद्धार गरिएको बताउनुभयो । उहाँले महानगर पालिकाले सबै बाल उद्धारसम्बन्धि सरकारी निकायहरुसँगको समन्वयमा काम गरिरहेको बताउनुभयो ।

उहाँले भन्नुभयो, ‘दुःखको कुरा हो । देशको सबै भन्दा ठूलो प्रशासनिक केन्द्र हो । सिंहदरबारमा नागरिकता नलिई छिर्न पाउँदैन । नक्कली नागरिकता देखाउँदा पनि छिर्न पाउँदैनन । सक्कल नै देखाउनुपर्छ । भित्रबाट कसैले जिम्मा लिएर छिर्न पाउने ठाउँमा नागरिकता नबनेका कलिला बच्चाहरुलाई कसरी काममा लगायो । सोचनिय विषय हो । यसले धेरै किसिमको सुरक्षा देखि लिएर फेसलाई उजागर गरिदिएको छ । भारतीय बालबालिका थिए भन्ने गुनासो आएको थियो । तर अनुगमनका क्रममा देख्न पाएनौं । यसलाई जारी राख्छौं । महानगरपालिका बालबालिकाको हकलाई लिएर गम्भिर छ ।’

उहाँले महानगरपालिकाले बालश्रमविरुद्धको अभियान तीब्र बनाउने बताउनुभयो ।

‘आज सिंहदबारबाट दुई जना बालक र दुई जना बालिका चार जनालाई उद्वार गरौं । श्रम सम्झौता विना तथा उमेर नपुगी काममा राखिएको रहेछ । बालबालिकाहरुको नागरिकता देखाउन सक्नु भएको छैन । एक जनाले नागरिकता देखाए पनि १६ वर्ष मात्रै पुगेको छ । सबै बाल उद्वारसम्बन्धि सरकारी निकायहरुसँगको समन्वयमा काम गरिरहेका छौं,’ उहाँले भन्नुभयो ।

महानगरपालिका केही दिनदेखि बालश्रमिक विरुद्ध अभियान चलाइरहेको छ ।