छिमेकीको कुटपिटबाट धनगढीमा युवकको मृत्यु, पाँच जना पक्राउ
धनगढी, फागुन २८ । छिमेकीको कुटपिपटबाट धनगढीमा एक युवकको मृत्यु भएको छ ।
धनगढी उपमहानगरपालिका-८ को धनगढी गाउँमा सोमबार राति ३५ वर्षीय महेश रानाको छिमेकीको कुटपिटबाट मृत्यु भएको प्रहरीले जनाएको छ ।
राना राति स्थानीय मिनबहादुर चौधरीको घरमा प्रवेश गरेका बेला उनीमाथि कुटपिट भएको जिल्ला प्रहरी कार्यालयका प्रहरी निरीक्षक उपेन्द्र बमले बताए ।
उनका अनुसार कुटपिटबाट गम्भीर घाइते भएका रानाको उपचारका क्रममा सेती प्रादेशिक अस्पतालमा मृत्यु भएको हो । रानाको हत्या अभियोगमा मिनबहादुर चौधरी दम्पतीसहितका पाँच जना पक्राउ परेका छन् ।
पक्राउ पर्नेमा मिनबहादुरकी श्रीमती २९ वर्षीया पुनम चौधरी, छोरी र अन्य दुई जना रहेको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।
प्रकाशित मिति: २८ फाल्गुन २०८०, सोमबार