विमानस्थलबाट भारतीय रुपैयाँसहित टर्किस नागरिक पक्राउ
काठमाडौं, फागुन ३। त्रिभुवन अन्तर्राष्ट्रिय विमानस्थलबाट ९६ हजार भारतीय रुपैयाँसहित एक जना टर्किस नागरिक पक्राउ परेका छन् ।
बिहीबार बिहान साढे ११ बजे यूएईको सारजहाबाट आएका अब्दुला मियाँलाईपक्राउ गरिएको विमानस्थल प्रहरी प्रमुख प्रहरी वरिष्ठ उपरीक्षक (एसएसपी) कृष्णहरि शर्मा पोख्रेलले जानकारी दिए।
उनका अनुसार मियाँको साथबाट ५ सय दरको अवैध भारतीय मुद्रा बरामद गरिएको छ ।
बुधबार पनि झण्डै एक करोड नेपाली रुपैयाँ बराबरको विदेशी मुद्रासहित दुई जना पाकिस्तानी नागरिक पक्राउ परेका थिए ।
पक्राउ परेका सबैलाई सम्पत्ति शुद्धिकरण अनुसन्धान विभागमा पठाइने प्रहरीले जनाएको छ ।
प्रकाशित मिति: ३ फाल्गुन २०८०, बिहिबार
