५३ तोला चाँदीसहित बाराबाट दुई जना पक्राउ

वीरगन्ज, माघ ९ । बारामा ५३ तोला चाँदीसहित दुई जना पक्राउ परेका छन् ।

जिल्ला प्रहरी कार्यालय बाराले विशेष सूचनाको आधारमा गरेको जाँचका क्रममा पथलैयाबाट धरान उपमहानगर वडा नम्बर ५ बस्ने गुजराज विक र सुनसरीको इटहरी नगरपालिका बस्ने बद्री विकलाई पक्राउ गरेको हो ।

वीरगन्जबाट काठमाडौँतर्फ जाँदै गरेको बागमती प्रदेशको ०२–०२७ प १८५१ नम्बरको मोटरसाइकललाई जाँच गर्दा फर्जी बिल भेटिएपछि उनीहरुलाई पक्राउ गरिएको बारा प्रहरीले जनाएको छ ।

उनीहरुको साथबाट चाँदीका लकेट २२ थान, औँठी ३३ थान, मंगलशुत्र १८ थान, कानको टप २६ थान र गणेश लकेट ७० थान गरी ५३ तोला चाँदी बरामद गरिएको बाराका प्रहरी प्रवक्ता दधिराम न्यौपानेले बताए ।

पक्राउ परेका दुबै जनामाथि आवश्यक अनुसन्धान भइरहेको बारा प्रहरीले जनाएको छ ।