फारवेष्ट पशुपति कपको मिति दोस्रोपटक सर्याे, खेल तालिका सार्वजनिक

धनगढी, मंसिर २९ । छैठौं फारवेष्ट पशुपति कप फुटबल प्रतियोगिताको मिति दोस्रो पटक सरेको छ । पहिलो पटक एक साता सारिएको प्रतियोगिता पुनः एक साता पर सारिएको हो ।

आयोजक फारवेष्ट पशुपति युवा क्लबले यसअघि प्रतियोगिता मंसिर २२ गतेदेखि आयोजना गर्ने तयारी गरेकोमा एक साता पर सार्दै मंसिर २९ गते (आज)का लागि तोकिएको थियो । तर पुनः प्राविधिक कारण देखाउँदै थप एक साता सारेर प्रतियोगिता पुस ६ गतेदेखि आयोजना गरिने आयोजक फारवेष्ट पशुपति युवा क्लबका अध्यक्ष खेम रावतले जानकारी दिए ।

प्रतियोगिता एक सातका लागि सरेपनि आयोजकले खेल तालिका भने सार्वजनिक गरेको छ । प्रतियोगितामा सहभागी १५ टीमलाई दुई समुहमा विभाजन गर्दै प्रतियोगिताको खेल तालिका सार्वजनिक गरिएको हो । प्रतियोगिताको उद्घाटन खेलमा पुस ६ गते स्टार सिटी युवा क्लब र पुर्नवास नगरपालिका खेलकुद विकास समिति खेल्नेछन् ।

समुह ए मा स्टार सिटी र पुर्नवास नगरपालिका खेलकुद विकास समिति सँगै टेकवहादुर चोखाल फाउण्डेसन, घोडाघोडी युवा क्लब, विएस १५ फुटबल एकेडेमी, एपिएफ ७ नम्बर वाहिनी, सिएफसी क्लब कोलकोत्ता र सुदुरपश्चिम ११ स्पोर्टस क्लब रहेका छन् ।

समुह बी मा ईलाईट युवा क्लब, अल स्टार्स एकेडेमी, वाईज युनियन लम्की, नेपाल प्रहरी सुदुरपश्चिम प्रदेश, पुर्नवास युनाईटेड क्लब, ग्रीन सिटी क्लब र आयोजक फारवेष्ट पशुपति युवा क्लब रहेका छन् ।

प्रतियोगिताको विजेताले पाँच लाख र उपविजेताले २ लाख पाउने छन् । प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५–१५ हजार रुपैयाँ पुरस्कार पाउने आयोजक फारवेष्ट पशुपति युवा क्लबका अध्यक्ष खेम रावतले बताए ।

प्रत्येक खेलको म्यान अफ द म्याचले पाँच हजार नगद पाउने छन् । सबै धनराशी जोडेर आठ लाख ७० हजार नगद पुरस्कार दिईने आयोजक फारवेष्ट पशुपति युवा क्लबले जनाएको छ । प्रतियोगिता सञ्चालनमा झण्डै ४९ लाख रुपैयाँ खर्च हुने अनुमान गरिएको छ ।