पेन्टागन भन्छ- चीनले तीव्र गतिमा आणविक हतियारको विकास गर्दैछ

वाशिंटन । चीनले यसअघि अपेक्षा गरिएकोभन्दा तीव्र गतिमा आणविक हतियारको विकास गरिरहेको पाइएको छ । अमेरिकी रक्षा प्रशासन पेन्टागनले जारी गरेको प्रतिवेदनमा चीनले अपेक्षाभन्दा तीव्र गतिमा आणविक हतियारको विस्तार गरिरहेको उल्लेख छ ।

पेन्टागनको प्रतिवेदनमा चीनले अन्तरमहादेशीय ब्यालेस्टिक क्षेप्यास्त्र प्रणलीको पनि विकास गरिरहेको जनाइएको छ ।

पेन्टागनको प्रतिवेदनलाई उद्धृत गर्दै बेलायती अखबार द गार्जियनको अनलाइन संस्करणले जनाएअनुसार चीनले विकास गरिरहेको अन्तरमहादेशीय ब्यालेस्टिक क्षेप्यास्त्रले मुख्यभूमि अमेरिका, हवाई र अलास्का राज्यहरुमा पनि मार हान्ने क्षमता राख्छ ।

युक्रेनमा जारी युद्धबाट ‘पाठ सिक्दै’ ताइवानमा हुनसक्ने द्वन्द्वलाई मध्यनजर गरी चीनले आफ्नो हतियार भण्डारण विस्तार गरिरहेको गार्जियनले उल्लेख गरेको छ ।

यसबाट हिन्द प्रशान्त क्षेत्रमा दीर्घकालीन अमेरिकी सुरक्षा चासोमा गम्भीर जोखिम पैदा हुनसक्ने पेन्टागनको प्रतिवेदनमा जनाइएको छ । प्रतिवेदनमा चीनले सन् २०३० सम्म १ हजार आणविक हतियार तैनाथ गर्नसक्ने जनाइएको छ ।

यसअघि गत वर्ष सन् २०२२ मा पेन्टागनले सार्वजनिक गरेको यस्तै प्रतिवेदनमा सन् २०३५ सम्म चीनले १५ सय आणविक हतियार तैनाथ गरिसक्ने जनाइएको थियो । हाल अमेरिकासँग ३ हजार ७ सय ५० सक्रिय आणविक हतियार रहेको बताइन्छ ।