नेपालको सेमिफाइनल खेल हेर्न निश्चित टिकट, घरमै बसेर हेर्न अनुरोध

काठमाडौँ, कार्तिक १६ । नेपाल क्रिकेट संघ (क्यान) ले टी—२० विश्वकप छनोटअन्तर्गत शुक्रबार हुने नेपाल र संयुक्त अरब इमिरेट्स (यूएई) बिचको सेमिफाइनल खेल घरमै बसेर हेर्न समर्थकहरुसँग आग्रह गरेको छ ।

नेपाल र यूएईबिचको सेमिफाइनल खेल मुलपानी क्रिकेट मैदानमा खेलिने छ । क्यानका अनुसार सेमिफाइनल खेलका लागि मात्र तीन हजार पाँच सय टिकट मात्रै बिक्री गरिने छ । जुन अनलाइनमार्फत आईएमई पेबाट मात्रै काट्न सकिने छ ।

निश्चित संख्यामा उपलब्ध हुने सेमिफाइनल खेलको टिकट आईएमई पेमार्फत काट्न क्यानले अनुरोध गरेको छ । खेल मैदानमा टिकटको बुथ हुनेछैन ।

‘सम्पूर्ण दर्शकलाई नेपालको सेमिफाइनल खेल सकभर घरमै बसेर हेर्नु हुन हामी हार्दिक अनुरोध गर्दछौं,’ क्यानले भनेको छ ।