टी–२० विश्वकपमा छनोट हुन नेपालले भोलि यूएईसँग खेल्ने
काठमाडौं, कार्तिक १६ । टी–२० विश्वकपमा छनोट हुन नेपालले युएईसँग खेल्नुपर्ने भएको छ ।
नेपाल समूह चरणको अन्तिम खेलमा ओमानसँग ५ रनले पराजित हुँदै उपविजेता बनेपछि नेपालको भेट युएईसँग हुने भएको हो । युएई समूह बी को बिजेता बनेको छ ।
समूह विजेता बन्ने लक्ष्यसहित बिहीबार मैदान उत्रिएको नेपालले ओमानले दिएको १४६ रनको लक्ष्य भेट्टाउन सकेन ।
मूलपानीमा भएको समूह बीको खेलमा युएईले हङकङ २२ रनले हराउँदै समूह बिजेता बनेको छ । १७७ रनको लक्ष्य पछ्याएको हङकङ ८ विकेट गुमाएर १५४ रनमा समेटियो ।
यो जितसँगै युएई समूह विजेता बनेकाले भोलि नेपालसँग फाइलनका लागि खेल्ने निश्चित गरेको हो ।
एसिया छनोट फाइनल खेल्नुअघि त्रिकोणात्मक सिरिजको लिग चरणको दुबै खेलमा नेपालले यूएईलाई हराएको थियो । तर फाइनलमा नेपाललाई हराएर युएईले उपाधि जितेको थियो ।
भोलिको खेलमा भने नेपाललाई त्यो हारको बदला लिएर विश्वकपमा छनोट हुने मौका छ ।
प्रकाशित मिति: १६ कार्तिक २०८०, बिहिबार
