सिटिजन्स बैंककाे मोबाइल एपमा यस्ता छन् थपिएका नयाँ सुविधा

काठमाडौं । सिटिजन्स बैंक इन्टरनेसनलले मोबाइल बैंकिङ एपमा नयाँ सुविधा थप गरेको छ । डिजिटल बैंकिङलाई प्राथमिकतामा राख्दै आएको बैंकले हालको मोबाइल बैंकिङ एपमा सेवा थप गरेको हो ।

अब ग्राहकहरुले मोबाइल बैंकिङ एपमार्फत नै मुद्दती खाता खोल्ने, चेक रोक्का गर्ने, डेबिट कार्ड प्राप्त गर्न निवेदन दिने, कार्ड ब्लक गर्ने, पिन रिसेट गर्ने, क्रेडिट कार्डको सीमा हेर्ने जस्ता सुविधाहरु थप गरेको जनाएको छ ।

बैंकले आफ्ना विशेष ग्राहकहरुलाई लक्षित गरी मोबाइलमार्फत नै प्रिभिलेज बैंकिङ सेवा समेत सुरु गरेको छ । यस अघि बैंकले विभिन्न प्रिभिलेज काउन्टरहरु मार्फत प्रिभिलेज बैंकिङ सेवा प्रदान गर्दै आइरहेकोमा अब मोबाइल बैंकिङ एप मार्फत नै प्रिभिलेज सेवाहरु प्रदान गर्ने जनाएको छ।

सेवा अन्तर्गत ग्राहकहरुले बैंकका तोकिएका सम्पर्क अधिकृतहरु मार्फत बिना झन्झट बैंकिङ सेवा प्राप्त गर्न सक्नेछन् ।सिटिजन्स स्मार्ट मोबाइल बैंकिङ एपलाई नयाँ युजर इन्टरफेसमा अपग्रेड गरिएको छ ।

जसले प्रयोगकर्ताको अनुभव बढाउने बैंकको विश्वास छ । लागू गरिएको नयाँ डिजाइन प्रयोगकर्तामैत्री बनाइएको भन्दै नेपालपे क्यूआरमार्फत व्यापारीहरूलाई क्युआर स्क्यान गरी भुक्तानी गर्ने सुविधा पनि थपिएको बैंकको भनाइ छ ।