विद्यालयमा अज्ञात समूहले गर्यो आगजनी
काठमाडौं, भदौ २८ । बैतडीमा एक विद्यालयमा अज्ञात समूहले आगजनी गरेको छ।
जिल्लाको दशरथचन्द नगरपालिका–६ थालिगडास्थित कालिका माविमा रातिको समयमा आगजनी गरिएको हो।
आगजनीबाट कार्यालयको कोठामा रहेका कागजपत्र नष्ट भएको विद्यालयका प्रधानाध्यापक पदमराज लेखकले जानकारी दिए।
उनका अनुसार कार्यालयको ढोका फुटाएर भित्र रहेका कागजपत्र ग्यालरीमा ल्याएर जलाइएको छ। सर्टिफिकेट, बैंकमा दाखिला गरेका भौचर, रजिस्टर, दर्ता चलानीलगायतका महत्वपूर्ण कागजपत्र नष्ट भएका छन् ।
विद्यालयमा कसले र किन आगजनी गर्यो भन्ने यकिन भएको उनले बताए । आगजनीबाट भएको क्षतिको विवरण र आगजनी गर्ने समूहको खोजीका लागि प्रहरीमा निवेदन दिएको विद्यालयले जनाएको छ।
यस्तै विद्यालय नजिक रहेको उद्धवसिंह कार्कीको किराना पसलमा पनि चोरी भएको छ। विद्यालयमा आगजनी र पसलमा चोरी गर्ने समूहको खोजी कार्य भइरहेको प्रहरीले जनाएको छ ।
प्रकाशित मिति: २८ भाद्र २०८०, बिहिबार
