दिनेश कुमार घिमिरे सचिवमा बढुवा

काठमाडौं भदौ १२
सरकारले दिनेशकुमार घिमिरेलाई सचिवमा बढुवा गरेको छ । सचिवमा बढुवा भएका घिमिरे हाल चीनको छेङ्दुस्थित महावाणिज्य दूतावासमा महावाणिज्य दूत छन् ।

मङ्गलबार प्रधानमन्त्री तथा मन्त्रिपरिषद्को कार्यालय सिंहदरवारमा बसेको मन्त्रिपरिषद् बैठकले घिमिरेलाई सचिवमा बढुवा गर्ने निर्णय गरेको हो ।

लोकसेवा आयोगका अध्यक्ष माधवप्रसाद रेग्मीको अध्यक्षतामा सोमबार सिंहदरवारमा बसेको बढुवा सिफारिस समितिको बैठकले प्रशासनतर्फ रिक्त सचिव पदमा बढुवाका लागि पहिलो नम्बरमा दिनेशकुमार घिमिरे, दोस्रो नम्बरमा राधिका अर्याल र तेस्रो नम्बरमा चूडामणि पौडेलको नाम सिफारिस गरेको थियो ।

यस्तै सचिव बढुवाका लागि दोस्रो नम्बरमा सिफारिस भएका अर्याल उद्योग वाणिज्य तथा आपूर्ति मन्त्रालयमा आपूर्ति व्यवस्था तथा उपभोक्ता हित संरक्षण महाशाखा प्रमुख एवं प्रवक्ता छिन् । पौडेल शिक्षा तथा मानव स्रोत विकास केन्द्रका महानिर्देशक हुन् ।