जापानमा नासिरको राष्ट्रिय कीर्तिमान, तोडे आफ्नै ‘रेकर्ड’

काठमाडौं, साउन ७ । नासिर याह्या हुसेनले जापानको फुकुओकामा आयोजना भएको ‘वर्ल्ड एक्वाटिक च्याम्पियनसिप—२०२३’ मा नयाँ राष्ट्रिय कीर्तिमान बनाएका छन् ।

फुकुओकामा नासिरले चार सय मिटिर फ्रिस्टायल स्पर्धामा नयाँ राष्ट्रिय कीर्तिमान बनाएको नेपाल पौडी संघका अध्यक्ष अशोक बज्राचार्यले जानकारी दिए ।

प्रतियोगितामा नासिरले निर्धारित दूरी चार मिनट ८.२३ सेकेन्डमा पूरा गरे । यसअघि पनि उक्त कीर्तिमान नासिरकै नाममा रहेको थियो । यसअघि नासिरले सोही दूरी चार मिनेट १२.१७ सेकेन्डमा पूरा गरेका थिए ।

नासिरले उक्त कीर्तिमान गत असारमा आयोजना भएको ११औँ एनएसए कप पौडी प्रतियोगितामा बनाएका थिए । जापानमा जारी प्रतियोगितामा अब नासिरले पुरुष दुई सय मिटर फ्रिस्टायल र गौरिका सिंहले एक सय मिटर ब्याकस्ट्रोकमा प्रतिस्पर्धा गर्न बाँकी छ ।