भारतमा नगद र सुनसहित ५ करोड मूल्य बराबरको सामान चोरेर एक नेपाली फरार

एजेन्सी । भारतका एक व्यापारीको ५ करोड मूल्य बराबरको सामान चोरेर एक नेपाली फरार भएका छन् ।

भारतको सेकुन्देराबादस्थित रामगोपालपेटका बासिन्दा राहुल गोयलको घरमा सुरक्षाकर्मीका रुपमा काम गरिरहेका कमल नामका नेपाली बहुमुल्य सामान चोरेर परिवारसहित फरार भएका हुन् । कमल र उनको पूरा परिवार राहुलको बङ्गलामै रहेको सर्भेन्ट क्वार्टरमा बस्दै आएका थिए ।

आइतबार बिहान राहुल र उनका परिवार एउटा पारिवारिक कार्यक्रमका लागि सहर बाहिरको उनीहरूको फार्म हाउसमा गएर बुधवार बेलुका मात्रै घर फर्कियो । घर आउँदा उनीहरुले सुरक्षाकर्मी र उनको परिवार कसैलाई पनि देखेनन् ।

‘राहुल घरभित्र जाँदा बेडरुमको कपबोर्ड भित्रका सामान चोरी भएको पाए । उनको दाबी अनुसार ४९ लाख नगद, चार केजी सुन, १० केजी चाँदी चोरी भएको छ । मुख्य सन्दिग्ध ती सुरक्षाकर्मी र उनको परिवार रहेको स्टेसन आवर अफिसर जी लिङ्गेश्वर रावले बताएका छन् ।

प्रहरीले कमल र उनको परिवारलाई पक्राउ गर्न विशेष दल गठन गरेको छ । ‘घटनामा कमल नै संलग्न हुन् वा अरू व्यक्ति भनेर पनि अनुसन्धान भइरहेको रावले बताए । प्रहरीका अनुसार कमलका केही आफन्तलाई मुम्बईमा पक्राउ गरिएको छ ।