क्यान अध्यक्ष र कार्यवाहक सचिव जिम्बाव्वे पुगे

काठमाडौं, असार १९ । जिम्बाव्वे क्रिकेटको निमन्त्रणामा नेपाल क्रिकेट संघ क्यानका अध्यक्ष चतुरबहादुर चन्द र कार्यवाहक सचिव दुर्गाराज पाठक जिम्बाव्वे पुगेका छन् ।

‘जिम्बाव्वेले विश्वकप छनोटमा सहभागी १० मध्ये ९ टिमका अध्यक्षहरुलाई निमन्त्रणा गरेपछि कार्यवाहक सचिवसहित अध्यक्ष चन्द त्यसतर्फ गएका हुन् ।

जिम्बाव्वे पुगेको चन्दले जिम्बाव्वे, आयरल्याण्ड जस्ता देशहरुसँग वार्षिक रुपमा शृंखला खेल्ने गरी पनि छलफल गरिने बताएका छन् ।

नेपालले गत वर्ष जिम्बाव्वेको ए टोलीसँग काठमाडौंमा एकदिवसीय र टी–२० शृंखला खेलेको थियो ।

बुधबार जिम्बाव्वे क्रिकेटका अध्यक्ष ताभेङग्वा मुकुहलानीसँग बैठकपछि अध्यक्ष चन्द र सचिव पाठक उतैबाट दक्षिण अफ्रिका जानेछन् । जहाँ उनीहरुले आईसीसीको वार्षिक सम्मेलनमा भाग लिने छन् ।