बङ्गलादेश : २६ जनालाई फाँसी दिने जल्लाद शाहजहाँ ३२ वर्षपछि रिहा

एजेन्सी, असार ५
बङ्गलादेशको इतिहासमा सबैभन्दा बढी मानिसलाई फाँसी दिने जल्लाद शाहजहान भुइया जेलबाट रिहा भएका छन् ।

७४ वर्षीय शाहजहाँ भुइयालाई जल्लाद शाहजहाँ पनि भनिन्छ । ३२ वर्षको जेल सजायपछि उनी आइतबार रिहा भएका हुन् ।

बीबीसी बङ्गलाका अनुसार जल्लाद शाहजहाँले बङ्गलादेशमा मृत्युदण्डको सजाय पाएका २६ जना दोषीलाई विभिन्न कारागारमा जल्लादको कर्तव्य निर्वाह गर्दा फाँसी दिएका थिए ।

शाहजहाँ भुइँयालाई सन् १९९१ मा प्रहरीले पक्राउ गरेको थियो । उनलाई हतियार राखेको मुद्दामा १२ वर्ष र डकैती–हत्या मुद्दामा ३० वर्ष कैद सजाय सुनाइएको थियो ।

उनलाई ४२ वर्षको जेल सजाय सुनाइएको थियो तर जेलमा उनलाई राम्रो व्यवहारका कारण सजायमा छुट दिँदै ३१ वर्षपछि रिहा गरिएको हो ।

जेलमा रहँदा पनि उनले जल्लादको काम गरे । एक दशक जेल बसेपछि उनले सन् १९८९ मा सहायक जल्लादका रूपमा आफ्नो जीवनको नयाँ अध्याय सुरु गरे । आठ वर्षपछि सन् १९९७ मा उनी प्रमुख कार्यकारी अधिकृतको पदमा बढुवा भए ।

जेलबाट रिहा भएपछि शाहजहाँले के भने ?

जेलबाट छुटेपछि जल्लाद शाहजहाँले पत्रकारहरूसँग कुरा गर्दै भने, ‘मसँग बस्ने ठाउँ नभएकोले मलाई घर चाहिन्छ । प्रधानमन्त्रीलाई घर दिन अनुरोध गर्दछु ।’

‘मसँग मेरी बहिनी र भतिजा मात्र छन्, तर लामो समयदेखि सम्पर्कविहीन भएका छन् । अब बाँच्नको लागि अरूको दयामा भर पर्नुपर्ला कि भन्ने डर छ ।’

उनले भने, ‘म मेरो बाँकी जीवन शान्तिसँग बिताउन चाहन्छु ।’

मानिसलाई फाँसी दिनुपर्‍यो भनेर कुनै पछुतो छ त भनेर उनलाई प्रश्न सोधिएको थियो । यसको जवाफमा उनले भने, ‘कसैलाई मृत्युदण्ड दिने भन्ने निर्णय मैले गर्ने होइन । यो काम अदालतको हो ।’

‘अहिलेसम्म फाँसी दिइएका सबैले सर्वोच्च अदालत र राष्ट्रपतिसमक्ष पनि माफीका लागि अपिल गरेका छन् । उनीहरूको अपिल खारेज हुँदा मैले किन पछुताउनु पर्‍यो र ? ’