अमेरिकी राष्ट्रपति वाइडेन कार्यक्रममै लडेपछि…

वासिङटन डिसी, जेठ १९
अमेरिकी राष्ट्रपति जो बाइडेन लडेका छन् । कोलोराडोमा आयोजित अमेरिकी वायुसेना एकेडेमीको स्नातक समारोहमा डिप्लोमा हस्तान्तरण गर्ने क्रममा उनी लडेका हुन् ।

उमेरले ८० वर्ष पुगेका सबैभन्दा वृद्ध राष्ट्रपति हात मिलाउने क्रममा खुट्टा फर्किदा उनी लडेका थिए, उनलाई तुरुन्तै सुरक्षाकर्मीले मद्दत गरेर उठाएका थिए ।

सो कार्यक्रममा उपस्थित रहेका ९ सय ८१ स्नातक क्याडेटहरू प्रत्येकसँग हात मिलाउन राष्ट्रपति करिब डेढ घण्टा उभिएका थिए। ह्वाइट हाउसका सञ्चार निर्देशकले पहिले भने, ‘अहिले उनी ठीक छन्,’

‘उहाँले हात मिलाउँदै गर्दा स्टेजमा बालुवाको झोला थियो, उनी त्यसैमा ठोक्किँदा खुट्टा लडबडाउन पुग्यो,’ निर्देशक बेन लाबोल्टले बिहीबारको सो घटनावारे ट्विटरमा लेखेका छन् ।

त्यो साँझ ह्वाइट हाउसमा फर्किँदा पत्रकारहरूसँग मुस्कुराउँदै राष्ट्रपतिले ठट्टा गरे, ‘म बालुवाको झोलामा ठाेक्किएँ, अनि लडे जस्तो भएँ ।’